“Suldaan Xassan, Saddexdayadaba Kii Aad raacdo Iyo Kaad Ka Tagtaba Waxuu Tirsanayaa Xaqdarro, Sababtoo Ah Halkii Lagu Tartamayey, Laguna Kala Baxayey Weli Lama Gaadhin”.

Wasiirka Wasaarada Maaliyadda Somaliland Md. Cabdicasiis Maxamed Samaale ayaa markii koowaad si adag uga hadlay go’aankii ay ku kala qaybsameen gudida horumarinta sacad Muuse ee aadka loogu dhaliilay inay faraha la galeen waxaan loo dirsan kaasi oo bur bur u horseedi kara midnimadii beesha sacad Muuse,waxa uu Wasiir Samaale weedho hoga-tusaalayn ah u celiyey hadal Suldaanka Guud ee beesha Subeer Awal ku duray hankiisa musharaxnimo marka Madaxweyne Axmed Siilanyo dhamaysto muddo xileedkiisa labaad.

Suldaanka Guud ee Beelaha Subeer Awal Suldaan Xasan Suldaan Cabdilaahi Suldaan Cabdiraxmaan oo Doraad hadal ka jeediyey munaasibad caadifadaysan oo reerka uu suldaanku ka soo jeedaa iskugu timid Hotel Maansoor oo ay ku taageerayeen Go’aankii ay soo saareen 13kii xubnood ee gudida horumarinta ee isla beeshaasi ka soo wada jeeday.Xafladaasi reeraysnayd ayuu Suldaanka Xasan ka yidhi hadal aan ujeedadiis la fahmin oo u dhignaa sidan “Waxa aan u mahadnaqayaa Wasiir Cabdicasiis Maxamed Samaale oo afartaa caano-maal ee ka dambeeyey go’aankan aynaan ka maqal wax hadal ah, waxaan filayaa inuu u bislaaday siyaasadda oo uu xogogaal u yahay in marka beeshaadu ku qabato, isagoo u soo joogay siyaasiin badan oo dalka ah oo markay eherlkooda iyo xigtadoodu qabtay addeecay, maanta mar haddaynaan waxba ka maqal waa inankeenii oo siyaasi ah oo sharaf wayn inaga mudan,” ayuu yidhi Suldaan Xasan Sul. Cabdillaahi Sul. Cabdillaahi, waxaannu intaa raaciyey, “Ragga maanta la hakiyey waa madaxdeennii oo ma kala jeclin oo waa isugu keen mid, kayd bay inoo yihiin maanta wixii ka dambeeya, waanaynu u aqoonsannahay inay hankaa leeyihiin.”

Haddaba,Wasiirka Wasaarada Maaliyada Somaliland Md. Cabdicasis Maxamed Samaale Hadalkaa suldaanka Beesha Siciid Ismaaciil ka jawaaab bixiyay , waxa uu sheegay inuu tixgelinayo oo uu qaddarin ka mudan yahay Suldaan Guud ee Beelaha Subeel Awal, balse waxa uu wasiirku Suldaanka kula gar-naqsaday inaanay sharaftiisa iyo magaca saldannada uu xambaasan yahay aanay u qurux badnayn inuu u kala eexdo siyaasiyiinta uu suldaanka u yahay ee kala ah Muuse Biixi Cabdi, Maxamed Biixi Yoonis iyo Cabdicasiis Maxamed Samaale.

Wasiirka oo ugu horeyn la weydiiyey sida uu u arko go’aanka uu Suldaanku dhowaan ku shaaciyey in madax-dhaqameedka iyo wax-garadka beeshu isku raacday murashaxnimada madaxweynaha ee Kulmiye inuu yahay Muuse Biixi Cabdi, waxa uu ku jawaabay, “Suldaan Xassan waa nin walaalkay ah, waa nin saaxiibkay ah, waa nin inaadeer-kay ah, runtii, waa suldaankii guud ee reerka, suldaanimadiisa ayaan ku ixtiraamayaa, xilka qaran ee reerka uu u hayo ayaan ku ixtiraamayaa oo ku qadarinayaa, waxaan leeyahay saddexdayadaba, (Cabdicasiis Samaale, Maxamed Biixi, iyo Muuse Biixi) suldaan ayaad u tahay, oo waalid ayaad u tahay, kuuma qurux badana, ilamana fiicna, saddexdayada inaan mid raacdo.”

Wasiirka oo hadalkiisa sii watay, waxa uu intaas ku daray oo uu yidhi, “Suldaan Xassan, saddexdayadaba kaad raaco iyo kaad ka tagtaba waxuu tisanayaa xaqdarro, sababtoo ah halkii lagu tartamayey, laguna kala baxayey weli lama gaadhin, markaa ayuu waajibku yahay in ka kale la yidhaahod isagaa soo baxay, oo kaga soo baxay tartankii musharaxnimada golahii dhexe, marka waxa laga hadlayo tahay musharaxnimada madaxtinimada, Madaxweyne Axmed Siilanyo dabadii, maalintaa inaad la sugto hadalkaaga, oo ka soo baxa mooyee ka kale ku tidhaahdo la shaqee, isagaa la doortee, oo go’aanka kama dambaysta ah ee golahii dhexe xisbiga KULMIYE ka soo baxay aqbal tidhaahdid.”
Wasiirka Maaliyadda Samaale ayaa sheegay inay kala duwan yihiin hawlaha dhaqanka iyo kuwa siyaasada, una qurux badnayd inuu dhexgalo Suldaan Xassan oo xaq-dhowr weyn ka mudan, waxaanu yidhi, “Suldaan Xasan, waa suldaankaygii waan ixtiraamayaa, laakiin hawsha siyaasadu, siyaasad weeye, laakiin maaha hawl la xidhiidha dhaqan. lama caleemo saarayo suldaan, lama caleema-saarayo caaqil, lama caleema-saarayo boqor.“Marka ay tahay siyaasi xaq leh, oo damac madaxweyne leh, inuu xisbiga ka soo dhexbaxo ayaa waajib ah, inuu golaha dhexe laga doorto ayaa waajib ah. Murashaxa madaxtinimada ee xisbiga KULMIYE doorashada soo socota waa Madaxweyne Siilanyo, murashaxa xisbiga madaxweyne Siilanyo dabadeedna waa ninka aqlabiyada golaha dhexe ee xisbiga hela, taana saddexdayada iyo inta kale ku soo biirtaba Suldaanku dhex buu u yahay inuu sugo runtii weeye,” Sidaas ayuu yidhi Wasiir Samaale.




Leave a Reply

Your email address will not be published. Required fields are marked *